പെണ്ണുകാണൽ - വേർഷൻ 1.0

ഈ വീക്കെൻറ് കൊച്ചീല് നിന്നിട്ട് കാര്യമില്ല. സഹമുറിയത്തികൾ എല്ലാരും വീട്ടിൽ പോയി. മാധവേട്ടന്റെ സെക്കണ്ട് ഹാൻഡ് ഇലക്ട്രോണിക്സ് കടയിൽ  നിന്ന് രണ്ടായിരം രൂപയ്ക്ക് വാങ്ങിയ 32 ഇഞ്ചിന്റെ ഒരു ടിവി മാത്രമാണ് ആകെയുള്ള ടൈംപാസ്സ്. ഇടയ്ക്കിടെ ഒരു പൊട്ടലോ ചീറ്റലോ കേട്ടാലായി. ദേഷ്യം വന്ന് മണ്ടയ്ക്കിട്ടൊന്നു കൊടുത്താൽ 10 മിനിറ്റ് അനർഘനിർഘളം പരിപാടി കാണാൻ പറ്റും. ഒറ്റയ്ക്കിരുന്ന് ടിവി  തട്ടുന്നതിനുള്ള റിസ്ക്‌ എടുക്കാൻ വയ്യാത്തതിനാലും വായിലോട്ടു തട്ടാനുള്ളത് സ്വയം വെച്ചുണ്ടാക്കിയാൽ എനിക്കെന്ത് തോന്നും എന്ന കാരണത്താലും വീട്ടിലോട്ട് കെട്ടിയെടുക്കാൻ തീരുമാനിച്ചു.

സാധാരണ ഞാൻ വീട്ടിലെത്തിയാൽ സിറ്റൗട്ടിന്റെ പടിയിലിരുന്നു സന്ധ്യ വരെ വിശേഷം പറയുന്ന അമ്മ എന്നെ കണ്ടതും നേരെ ലാൻഡ്‌ഫോണിൻറെ അടുത്തേയ്ക്കോടി. പാവം എന്റെ കൊച്ച് ഇത്രേ.....൦ ദൂരം (ഏതാണ്ട് 175 കി.മി.) യാത്ര ചെയ്ത് വന്നതല്ലേ., എന്തേലും കഴിച്ചോ? വിശക്കുന്നോ? ഏഹെ..ഒന്നും ചോദിച്ചില്ല. ഇതെന്താ ഇപ്പൊ ഇത്ര കാര്യായിട്ട് ഫോണില്...

"ആ. വന്നിട്ടുണ്ട്..ഞായറാഴ്ച.. രാവിലെയോ? 11 മണി? ആ അത് മതി. ശരി."

അല്ലേലും ഞാൻ വരുന്ന ആഴ്ച അമ്മയ്ക്ക് എങ്ങോട്ടേലും യാത്ര ഉണ്ടാകും. എനിക്കാണേല് ശനിയാഴ്ച വീട്ടിലെത്തിയാൽ തിങ്കളാഴ്ച രാവിലെ വരെ എങ്ങോട്ടും പോകാനിഷ്ടമല്ല.

"ഞായറാഴ്ച രാവിലെ 11 മണിക്ക് അമ്മ എങ്ങോട്ടാ ?"

"ഞാനെങ്ങും പോകുന്നില്ല, നീയും എങ്ങും പോകാണ്ടിരുന്നാൽ മതി"

"അതെന്താമ്മേ അങ്ങിനെ?"("ങ്ങ"യ്ക്ക് ഇത്തിരി സ്ട്രെസ്സ്)

"താഴത്തെ മാമന്റെ അനിയത്തീടെ ഭർത്താവിന്റെ പെങ്ങടെ ഭർത്താവിന്റെ  അനിയൻ ഒരാളുണ്ട്.ഗൾഫിലാ ജോലി. ഇപ്പൊ നാട്ടിലുണ്ട്, അവര് നാളെ ഇങ്ങോട്ട് വരുന്നെന്ന്."

ഇത്രേം പറഞ്ഞു നാണം കലക്കി ഒരു ചിരിയും പാസ്സാക്കി അമ്മ അകത്തോട്ട് പോയി.അപ്പൊ സംഭവം ലതാണ്.. പെണ്ണുകാണൽ..!!

"അമ്മേ..."
മറുപടിയില്ല.
വീണ്ടും "അമ്മേ .."
വീണ്ടും മറുപടിയില്ല..
"ആഹാ ...അമ്മച്ചീ..."

"എന്താടി നിന്ന് ലേലം വിളിക്കുന്നേ? വന്നിട്ട് മണിക്കുർ രണ്ടായി. താളം തുള്ളി മുറ്റത്ത്‌ തന്നെ അങ്ങ് നിന്നോ. പ്രായമെത്രെ ആയീന്നാ വിചാരം."

"അമ്മ വിഷയം മാറ്റണ്ട. എന്നോടൊരു വാക്ക് പോലും ചോദിക്കാതെ അമ്മ എന്തിനാ അവരോട് വരാൻ പറഞ്ഞത്?"

"അതൊന്നും പിള്ളേരറിയണ്ട കാര്യമല്ല."

"ഏഹ്, പിള്ളേരെ കെട്ടിച്ചാ ബാലവിവാഹത്തിന് കേസെടുക്കും."

"പിന്നേ, പന പോലെ വളർന്നു, ഒരു ബാലിക വന്നേക്കുന്നു.!!"

ഈ സംസാരം ചെന്നവസാനിച്ചത്‌ എന്റെ പട്ടിണി സമരത്തിലാണ്. തേങ്ങ വറത്തരച്ച നല്ല ചൂരക്കറിയും കപ്പയും ഒക്കെ കൂട്ടി എന്റെ മുന്നിലിരുന്ന് തട്ടിയിട്ട് ഒരു ടയലോഗ് - "ചോറ് വിളമ്പി വെച്ചിട്ടുണ്ട്. നിനക്ക് വേണേല് എടുത്ത് കഴിച്ചിട്ട് കിടന്നുറങ്ങ്."

എന്തൊരു ജാഡ..!! എനിക്ക് വേണേല്..!! ഇല്ല. ഇനി ഒരു വട്ടം കൂടി പറയാതെ ഞാൻ കഴിക്കില്ല. അമ്മയോട്ട് പറഞ്ഞുമില്ല, ഞാനൊട്ട്‌ കഴിച്ചുമില്ല. ഭക്ഷണശാപം..അല്ലാതെന്ത്..!! വിശപ്പിന്റെ കാഠിന്യവും കല്യാണം എന്ന കനി കഴിച്ചാൽ ജീവിതം കോഞ്ഞാട്ട ആകുമോ എന്ന പേടിയും കാരണം രാത്രി ഉറങ്ങാൻ കഴിഞ്ഞില്ല. ഇതിലും ഭേദം റപ്പായീസിലെ ചിക്കൻ ഫ്രൈയും കഴിച്ച് മാധവ്സ് ബ്രാൻഡ്‌ ടിവിയുംകണ്ട് കൊതുകിനേം തല്ലിക്കൊന്ന് അവിടെത്തന്നെ ഇരിക്കുന്നതായിരുന്നു. ടെസ്പ്..!!

നേരം വെളുക്കാറായപ്പോഴാ ഒന്ന് കണ്ണടച്ചത്‌. ക്ലാ ക്ലാ ക്ലീ ക്ലീ... മൈനയല്ല, കരിയിലക്കിളിയാ. രാവിലെ തുടങ്ങി. ഇതുങ്ങൾക്ക് കിടന്നുറങ്ങിക്കൂടെ? കൂടെ വേറെയും അപശബ്ദ്ങ്ങളുണ്ടല്ലോ. അമ്മ.!

"നട്ടുച്ച വരെ കിടന്നുറങ്ങിക്കോ..ഒരു ഉത്തരവാദിത്തവും ഇല്ല. ഇങ്ങനെയായാൽ എന്താ ചെയ്യാ? നാളെ വേറൊരു വീട്ടിലോട്ട് കയറിച്ചെല്ലാനുള്ളതാ....ബ്ലാ ബ്ലാ ബ്ലാ..

"അം.." - വേണ്ട, അമ്മോടിനി ഗുസ്തിപിടിച്ചാൽ വീണ്ടും പട്ടിണിയാകും.

"അമ്മേ..(സ്നേഹത്തോടെ)"

"വേഗം പോയി കുളിച്ചിട്ട് വാ. അവര് അരമണിക്കൂറിലിങ്ങെത്തും."

"അരമണിക്കൂറോ?!! അതൊന്നും ശരിയാകൂല്ല."

"അത്രെയൊക്കെ ശരിയായാൽ മതി"

"അം.." വേണ്ട, വേണ്ട..

ഉത്തരവ് പ്രകാരം റെഡി ആയി വന്ന് ദോശേം ചമ്മന്തിം തട്ടിക്കൊണ്ടിരുന്നപ്പോ ദേ വരുന്നു 2-3 വണ്ടികൾ. ഒരു പട തന്നെയുണ്ടല്ലോ..!!

ചെക്കൻ, ചെക്കൻറെ നാല് പെങ്ങൾസ്, മൂന്ന് അളിയൻസ്(ഒരാള് നാട്ടിലില്ലാന്ന്..ഭാഗ്യം), ഇവരുടെ കുട്ടികൾ, അമ്മ. ഇവർക്കെല്ലാം പുറമേ വീട്ടുകാർക്കിടയിൽ POC ആയിഎനിക്കിട്ട് പണി തന്ന അമ്മായിയും.

"അകത്തേയ്ക്കിരിക്കാം.." ഇത്രേം നേരം എന്നെ വഴക്ക് പറഞ്ഞോണ്ടിരുന്ന അമ്മ നയിസായിട്ട് ഉത്തമ വീട്ടമ്മയുടെ രൂപം പ്രാപിച്ചു എല്ലാവരെയും ആനയിച്ചിരുത്തി. ആൾക്കാരുടെ എണ്ണം കൂടിയത് കൊണ്ടാണോ, അതോ ഞാൻ അലമ്പിയാലോ എന്ന് വിചാരിച്ചിട്ടാണോ ആവോ അമ്മ തന്നെ എല്ലാവര്ക്കും ചായ കൊടുത്തു.

നമുക്ക് പ്രത്യേകിച്ച് നാണ്‍-മാൻ ഒന്നും ഇല്ലെങ്കിലും, അത് അവരെ അറിയിക്കണ്ടല്ലോ എന്ന് കരുതി അമ്മേടെ പിന്നില് പമ്മി നിൽക്കാൻ ഒരു ശ്രമം നടത്തി നോക്കിയതാ. അമ്മേക്കാളും ഒരടി നീളം കൂടുതലായത് കാരണം അത് ഫ്ലോപ്പായി.

"മോൾ ഇങ്ങു വന്നേ ?"

ങേ..!ഒരു പെങ്ങൾ!!

"ഇത്തിരി തടി കുറവാ, അത് സാരമില്ല ഞങ്ങള് ശരിയാക്കി എടുത്തോള്ളാം. "

ദൈവമേ, ഗാർഹികപീഡനമാണോ ചേച്ചി ഉദ്ധെശിച്ചത്?

"തടി കുറവാണേലും നീളം കൂടുതലാണ്, രണ്ടും കൂടി ക്യാൻസൽ ആയിക്കൊള്ളും."

അളിയാ...ഇത്രേം ചളി വേണോ?

അതൊരു തുടക്കം മാത്രമായിരുന്നു. അളിയൻമാർ ചളി പറയുന്നു. ചേച്ചിമാർ ആസ്വദിച്ച് ചിരിക്കുന്നു. പിള്ളേര് തേരാ പാരാ ഓടുന്നു. ഒരാൾ മാത്രം മസ്സില് പിടിച്ചിരിക്കുന്നു., നമ്മുടെ പയ്യൻസ്., 31 വയസ്സുള്ള "പയ്യൻസ്". സ്വർണപ്പല്ലില്ലാത്തോണ്ടാണോആവോ ആ മനുഷ്യന് ചിരി വരാത്തത്.

അവസാനം, ഒന്നൊന്നൊര മണിക്കൂർ നീണ്ടു നിന്ന "പെണ്ണുകാണൽ" അവസാനിപ്പിച്ച് വിരുന്നുകാരെല്ലാം യാത്ര പറഞ്ഞിറങ്ങി.

"അപ്പൊ ശരി, വിളിക്കാം"

നമ്മുടെ "പയ്യൻ" ഏറ്റവും മുൻപിലുള്ള കാറിലെ മുൻ സീറ്റിൽ, ഒരു വേ-ഫേരർ ലെൻസ് ഒക്കെ വെച്ച് നേരത്തെ പിടിച്ച മസ്സില് വിടാതെ  കയറിയിരുന്നു. എല്ലാവരും കയറി വണ്ടി എടുത്തപ്പോഴേക്കും തല ഒരു എൻപത്തഞ്ചു ഡിഗ്രി  തിരിച്ച് ഒരു മാതിരി രാഷ്ട്രിയക്കാരുടെ പോലെ വെളുക്കനെ ഒരു ചിരി. ഇതിനാണോ ഏതോ മഹാൻ പറഞ്ഞത്, "ലേറ്റ് ആയി വന്താലും സ്റ്റയിലായി വരുവേൻ.."

അവര് പോയ പാടെ ഞാനുമിറങ്ങി. തിങ്കളാഴ്ച്ച രാവിലെ പോയാൽ മതി, വയണേപ്പം ഉണ്ടാക്കിത്തരാം എന്നൊക്കെ പറഞ്ഞ് അമ്മ ഒന്ന് വീഴ്ത്താൻ നോക്കി. ഞാൻ വീണില്ല. വയണേപ്പം തിന്നില്ലേലും വേണ്ടീല, ഇതുപോലുള്ള "അതിമനോഹരമായ" ആചാരങ്ങൾ ഇനിയും ഉണ്ടെങ്കിലേ, അത് ശരിയാകില്ല.

പിന്നെ ഒരാഴ്ചത്തേയ്ക്ക് ഞാൻ അമ്മയോട് ഇതിനെപ്പറ്റി ഒന്നും ചോദിച്ചുമില്ല, അമ്മ ഒന്നും പറഞ്ഞതുമില്ല. ഏഹ്..എന്നാലും എന്താ സംഭവിച്ചത് എന്നറിയാൻ ഒരു ഒരു ആകാംഷ.

"അവര് വിളിച്ചില്ലേ അമ്മെ?"

"ആര്?"

"ലവര് "

"ഓ, ആ പയ്യന് ഇത്തിരി നീളം കുറവാ. നീ ശനിയാഴ്ച വാ, നമുക്ക് വേറെ നോക്കാം."

പ്ലിംഗ്..ചോദിച്ച് വാങ്ങിച്ചു.!

".അയ്യോ.അടുത്ത ആഴ്ച ഒരുപാട് പണിയുണ്ട്. എനിക്കുറക്കം വരുന്നു. ശരിയമ്മേ."

നാട്ടാപ്പാതിരാ ആയാലും ഉറങ്ങാതെ കറങ്ങി നടക്കുന്ന എന്നെ നല്ലോണം അറിയാവുന്ന അമ്മ ചോദിച്ചില്ല എന്താ 8 മണിക്ക് ഉറങ്ങുന്നേന്ന്. ഇന്നും ഇന്നലേം കാണാൻ തുടങ്ങിയതല്ലല്ലോ. എന്തായാലും മൂന്ന് നാല് മാസത്തേയ്ക്ക് ഒരു മനസ്സമാധൗ ഉണ്ടാരുന്നു.

NB: ഈ വന്ന കാലത്തും, ഒരോ ചെറിയ പരിപാടിക്ക് പോലും എല്ലാവരും ഒരുമിച്ചു കൂടുന്ന ആ കുടുംബത്തോട് ശരിക്കും ബഹുമാനം തോന്നി.